మంత్రి కేటీఆర్‌పై ట్విట్టర్ వేదికగా రేవంత్ రెడ్డి సెటైర్లు పేల్చారు. వ్యవసాయం అంటే అమెరికాలో అంట్లు తోమడం కాదని విమర్శలు గుప్పించారు. రైతులకు ఉచిత విద్యుత్‌ అంశం హాట్‌టాపిక్‌గా మారిన నేపథ్యంలో రేవంత్ చేసిన ట్వీట్ ప్రాధాన్యతను సంతరించుకుంది.
ప్రధానాంశాలు:
- ట్విట్టర్‌లో కేటీఆర్‌కు రేవంత్ రెడ్డి కౌంటర్
- వ్యవసాయం అంటూ సెలబ్రెటీలతో పార్టీలు చేసుకోవడం కాదని సెటైర్
- ఇరువురు నేతల మధ్య పేలుతున్న మాటల తూటాలు
ఉచిత విద్యుత్‌ అంశంపై రేవంత్ రెడ్డి, మంత్రి కేటీఆర్ మధ్య మాటల యుద్దం జరుగుతోంది. బీఆర్ఎస్ అసలు 24 గంటలు కరెంట్ ఇవ్వడం లేదని, దీనిపై మంత్రి కేటీఆర్ తనతో చర్చకు రావాలని టీపీసీసీ రేవంత్ రెడ్డి ఇటీవల సవాల్ విసిరారు. కేటీఆర్‌కు అసలు వ్యవసాయం గురించే తెలియదని, తాను వ్యవసాయ కుటుంబం నుంచి వచ్చినట్లు రేవంత్ తెలిపారు. ఈ క్రమంలో ఆదివారం రేవంత్ రెడ్డి ఆర్ఎస్‌ఎస్ ఏజెంట్ అని మంత్రి కేటీఆర్ చేసిన వ్యాఖ్యలు చర్చనీయాంశంగా మారాయి.
ఈ క్రమంలో కేటీఆర్‌కు ట్విట్టర్‌లో రేవంత్ రెడ్డి కౌంటర్ ఇచ్చారు. వ్యవసాయం అంటే అమెరికాలో అంట్లు తోమడం కాదని, జూబ్లీహిల్స్ గెస్ట్‌హౌజ్‌లలో సేద తీరడం కాదని ఆరోపించారు. సినిమా వాళ్లతో పార్టీలు చేసుకోవడం కాదని, అది మట్టి మనసుల పరిమళం, మట్టి మనుషుల ప్రేమ అని వ్యాఖ్యానించారు. ఎడ్లు – వడ్లు అని ప్రాసకోసం పాకులాడే గాడిద కేం తెలుసు గంధపు చెక్కల వాసన అని కేటీఆర్‌ను ఉద్దేశించి రేవంత్ సెటైర్లు వేశారు.
ఈ సందర్భంగా రాహుల్ గాంధీ ట్రాక్టర్ నడపడం, మహిళలతో కలిసి నాట్లు వేస్తున్న ఫొటోలను రేవంత్ పోస్ట్ చేసి కేటీఆర్‌కు కౌంటర్ ఇచ్చారు. కేటీఆర్‌కు వ్యవసాయం గురించి ఏమీ తెలియదని, కాంగ్రెస్‌కే రైతుల సమస్యల గురించి తెలుసని చెప్పేందుకు రేవంత్ ఇలా ట్వీట్ చేసినట్లు తెలుస్తోంది. తన ట్వీట్‌కు డ్రామా రావు, బైబై కేసీఆర్ అనే హ్యాష్‌ట్యాగ్‌లను రేవంత్ ఇచ్చారు. ఉచిత విద్యుత్‌పై కేటీఆర్, రేవంత్ రెడ్డి మధ్య మాటలు తూటాలు తీవ్ర స్థాయికి చేరుకున్నాయి. ఇరువురు ఒకరికి ఒకరు కౌంటర్లు ఇచ్చుకుంటున్నారు. గాంధీభవన్ రేవంత్ రెడ్డి గాడ్సే అని, ఉచిత విద్యుత్‌పై రేవంత్ నిస్సిగ్గుగా మాట్లాడుతున్నారని కేటీఆర్ ఆరోపించారు. ఈ వ్యాఖ్యలకు కౌంటర్‌గా రేవంత్ ఇవాళ ట్వీట్ చేశారు.
