యువగళం పాదయాత్రకు నారా లోకేష్ రెండు రోజులు బ్రేక్ ఇచ్చారు. ఈ నెల 14న కోర్టుకు హాజరయ్యేందుకు లోకేష్ వెళ్లారు. 13, 14న పాదయాత్రకు విరామం ప్రకటించారు. ఈ నెల 15 నుంచి పాదయాత్ర తిరిగి ప్రారంభంకానుంది. వైఎస్సార్‌సీపీ ఎమ్మెల్సీ పోతుల సునీతతో పాటుగా ఏపీ ఫారెస్ట్‌ కార్పొరేషన్‌ ఛైర్మన్‌ గుర్రంపాటి దేవేందర్‌రెడ్డిపై కోర్టులో కేసు వేసిన నారా లోకేష్. మేజిస్ట్రేట్ ముందు వాంగ్మూలం ఇచ్చేందుకు వెళ్లారు.
టీడీపీ జాతీయ ప్రధాన కార్యదర్శి నారా లోకేష్ యువగళం పాదయాత్రకు రెండు రోజులు బ్రేక్ ఇచ్చారు. కోర్టుకు హాజరుకావాల్సి ఉండటంతో విరామం ప్రకటించారు. తనపై, తన కుటుంబంపై సోషల్ మీడియాలో అసత్య ప్రచారం చేసిన వైఎస్సార్‌సీపీ నేతలపై లోకేష్ కోర్టులో క్రిమినల్‌ కేసులు దాఖలు చేశారు. వైఎస్సార్‌సీపీ సోషల్ మీడియా సమన్వయకర్త, ఏపీ ఫారెస్ట్‌ కార్పొరేషన్‌ ఛైర్మన్‌ గుర్రంపాటి దేవేందర్‌రెడ్డి, ఎమ్మెల్సీ పోతుల సునీతలపై మంగళగిరి కోర్టులో క్రిమినల్‌ కేసులు వేశారు.
ఈ కేసుకు సంబంధించి ఈ నెల 14న మంగళగిరి అడిషనల్‌ మేజిస్ట్రేట్ ఎదుట లోకేష్ హాజరుకానున్నారు. కోర్టులో తన వాంగ్మూలం ఇవ్వనున్నారు.. అందుకే ఈ నెల 13, 14న పాదయాత్రకు విరామం ప్రకటించారు. పాదయాత్ర ప్రస్తుతం నెల్లూరు జిల్లా ఉదయగిరి నియోజకవర్గంలో జరుగుతోంది.. బుధవారం సాయంత్రం కొండాపురంలో బహిరంగ సభ జరిగింది. అనంతరం గ్రామ శివారులోని శిబిరం దగ్గరకు లోకేష్ చేరుకున్నారు. అక్కడి నుంచి అమరావతికి బయలుదేరారు. ఈ నెల 15న 155వ రోజు శనివారం పాదయాత్ర యఉదయగిరి నియోజకవర్గం కొండాపురం దగ్గర నుంచి ప్రారంభమవుతుంది.
లోకేష్ పిన్ని కంఠమనేని ఉమామహేశ్వరి అనారోగ్య సమస్యలతో ఆత్మహత్య చేసుకున్న సంగతి తెలిసిందే. అయితే హైదరాబాద్‌ జూబ్లీ హిల్స్‌లో ఆమెకు ఉన్న ఐదెకరాల భూమిని లోకేష్ లాక్కొనే ప్రయత్నం చేశారని.. అందుకే ఆమె ఆత్మహత్య చేసుకొన్నారని దేవేందర్‌రెడ్డి సోషల్ మీడియా వేదికగా ప్రచారం చేశారు. అలాగే హెరిటేజ్‌లో రూ.500 కోట్లు పెట్టుబడి పెట్టిన ఉమామహేశ్వరిని మోసం చేయడంతో ఆమె ప్రాణాలు తీసుకున్నారని మరో ప్రచారం చేశారు. హెరిటేజ్ పేరుతో సారా పరిశ్రమ నడుపుతున్నారని ఎమ్మెల్సీ పోతుల సునీత ఆరోపించారు.
2022 సెప్టెంబ‌రులో తాడేపల్లి వైఎస్సార్‌సీపీ కార్యాలయంలో ఎమ్మెల్సీ పోతుల సునీత వ్యాఖ్యలు చేశారు. నారా చంద్రబాబుని సారా చంద్రబాబు నాయుడు అని పిలవాలని.. హెరిటేజ్ సంస్ధ ద్వారా వ్యాపారం చేస్తున్నామని చెప్తూ సారా పరిశ్రమ నడుపుతున్నారని తీవ్ర వ్యాఖ్యలు చేశారు. బీ-3 అంటే భువనేశ్వరి, బ్రాహ్మణి, బాబు అన్నారు. అలాగే భువనేశ్వరి, బ్రాహ్మణి కొట్టుకున్నారనే ఆరోపణలు చేసిన విషయాన్ని కోర్టులో ప్రస్తావించారు. తమ వ్యక్తిత్వాన్ని కించపరిచేలా ఇంకా చాలా దారుణమై వ్యాఖ్యలు చేశారని లోకేష్ కోర్టు దృష్టికి తెచ్చారు.ఈ ఇద్దరిపైనా లోకేష్ క్రిమినల్‌ కేసులు దాఖలు చేశారు. గుర్రంపాటి దేవేంద‌ర్ రెడ్డికి నోటీసులు పంపినా.. ఆయన పనిచేస్తున్న కార్యాలయానికి నోటీసులు పంపినా ఎవరూ తీసుకోలేదు. దీంతో వాట్సాప్‌లో నోటీసులు పంపారు.
