తెలంగాణ బీజేపీ కీలక నేత కిడ్నాప్.. ఆచూకీ కోసం పోలీసుల గాలింపు

తెలంగాణ బీజేపీ రాష్ట్ర కమిటీ సభ్యుడు తిరుపతి రెడ్డి కిడ్నాప్ కలకలం సృష్టిస్తుంది. నిన్న ఆయన కిడ్నాప్‌కు గురవ్వగా.. ఇప్పటివరకు ఇంకా ఆచూకీ లభించలేదు. దీంతో ఆయన కోసం పోలీసులు ముమ్మరంగా గాలింపు చర్యలు చేపడుతున్నారు. భార్య ఫిర్యాదుతో అనుమానితులను ప్రశ్నిస్తున్నారు.

ప్రధానాంశాలు:

• జనగామ బీజేపీ నేత తిరుపతి రెడ్డి కిడ్నాప్
• భార్య ఫిర్యాదుతో పోలీసుల దర్యాప్తు
• తిరుపతి రెడ్డి కోసం గాలింపు చర్యలు

జనగామ జిల్లాకు చెందిన తెలంగాణ బీజేపీ రాష్ట్ర నేత ముక్కెర తిరుపతి రెడ్డి కిడ్నాప్‌కు గురయ్యారు. హైదరాబాద్‌లో ఆల్వాల్‌లో కొంతమంది అగంతకులు ఆయనను కిడ్నాప్ చేసి గుర్తు తెలియని ప్రాంతానికి తీసుకెళ్లారు. నగరంలోని కుషాయిగూడలో కుటుంబసభ్యులతో కలిసి ఆయన ఉంటున్నారు. పని మీద ఆల్వార్ ఎమ్మార్వో కార్యాలయానికి వెళ్లారు. పని ముగించుకుని ఆఫీస్ నుంచి బయటకు రాగా.. అక్కడ కొంతమంది గుర్తు తెలియని వ్యక్తులు ఆయనను వాహనంలో ఎక్కించుకుని తీసుకెళ్లినట్లు తెలుస్తోంది.

తన భర్త కిడ్నాప్‌కు గురయ్యారనే సమాచారం తెలుసుకుని తిరుపతి రెడ్డి భార్య సుజాత ఆల్వార్ పోలీసులకు ఫిర్యాదు చేసింది. దీంతో పోలీసులు మిస్సింగ్ కేసు నమోదు చేసుకుని రంగంలోకి దిగారు. తహసీల్డార్ ఆఫీస్ దగ్గరలోని సీసీ కెమెరాలను పరిశీలిస్తున్నారు. ఏదో పనిపై ఎమ్మార్వో కార్యాలయానికి వెళ్లారని, అక్కడ నుంచి బయటకు వచ్చిన తర్వాత తన భర్త ఫోన్ పనిచేయలేని సుజాత ఫిర్యాదులో పేర్కొంది. ప్రత్యర్థులే తిరుపతి రెడ్డిని కిడ్నాప్ చేసి ఉంటారని ఆమె ఆరోపిస్తుంది. పోలీసులు తిరుపతి రెడ్డి ఆచూకీ కోసం గాలింపు చర్యలు చేపడుతున్నారు.

అయితే తిరుపతి రెడ్డికి ఆల్వాల్‌లోని పాకాల కుంటలో 5,929 గజాల స్థలం ఉంది. ఈ స్థలం విషయంలో గత కొంతకాలంగా కొంతమందితో వివాదం నడుస్తోంది. దీంతో స్థలం వివాదంలో ఉన్న ప్రత్యర్థులే ఆయనను కిడ్నాప్ చేసి ఉంటారనే అనుమానాలు వ్యక్తమవుతున్నాయి. జనగామ బీజేపీలో కీలక నేతగా ఉన్న తిరుపతి రెడ్డి.. రియల్ ఎస్టేట్ వ్యాపారం కూడా చేస్తున్నారు. రాష్ట్ర స్థాయిలో పార్టీలో కీలక స్థానంలో ఉండటంతో పాటు వచ్చే ఎన్నికల్లో జనగామ బీజేపీ టికెట్ కోసం పోటీ పడుతున్నారు. దీంతో ఆయన కిడ్నాప్ ఇప్పుడు జనగామ నియోజకవర్గంలో కలకలం రేపుతోంది. ఆయన అభిమానులు, బీజేపీ కార్యకర్తలు ఆందోళన చెందుతున్నారు.

గతంలో తప్పుడు పత్రాలు సృష్టించి తన భూమిని కబ్జా చేసేందుకు ప్రయత్నాలు చేస్తున్నారంటూ తిరుపతి రెడ్డి పోలీసులకు ఫిర్యాదు కూడా చేశారు. తన భూమిలో కొంతమంది అక్రమంగా గోడలు నిర్మించారని తెలిపారు. ఈ వివాదమే కిడ్నాప్‌కు కారణమా? అనేది తెలియాల్సి ఉంది.