తెలంగాణలో గ్రూప్-2 పరీక్షలను డిసెంబర్ 15, 16 తేదీల్లో నిర్వహించనున్నారు. హాల్‌టికెట్లను డిసెంబర్ 9 నుంచి అందుబాటులో ఉంచనున్నారు. వివరాల్లోకెళ్తే..
తెలంగాణలో టీజీపీఎస్సీ గ్రూప్ 2 పరీక్షల నిర్వహణకు ఏర్పాట్లు ఊపందుకుంటున్నాయి. డిసెంబర్ 15, 16 తేదీల్లో ఈ గ్రూప్ 2 ఎగ్జామ్స్ జరగనున్నాయి. ఇందుకు సంబంధించిన హాల్‌టికెట్లు డిసెంబర్ 9వ తేదీ నుంచి అందుబాటులోకి వచ్చాయి. టీజీపీఎస్సీ అధికారిక వెబ్‌సైట్‌ https://www.tspsc.gov.in/ నుంచి వీటిని డౌన్లోడ్ చేసుకోవాలని కమిషన్ సూచించింది. TGPSC హాల్‌టికెట్లు డౌన్లోడ్ సమయంలో ఏవైనా సాంకేతిక ఇబ్బందులు తలెత్తితే 040-23542185 లేదా 040-23542187 నంబర్లకు సంప్రదించాలని టీజీపీఎస్సీ తెలిపింది. లేదా [email protected] ఈ-మెయిల్‌ ద్వారా సందేశాలు పంపవచ్చని పేర్కొంది. హాలిటికెట్‌ డౌన్లోడ్ లింక్ ఇదే.
మరోవైపు తెలంగాణ రాష్ట్రంలో ఉద్యోగాల భర్తీపై టీజీపీఎస్సీ వేగంగా ముందుకెళ్తోంది. ఇప్పటికే గ్రూప్ 1తో పాటు గ్రూప్ 3 పరీక్షలను కూడా పూర్తి చేసింది. ఇక ఈనెలలోనే గ్రూప్ 2 పరీక్షలను నిర్వహించనుంది. ఈ మేరకు ఏర్పాట్లపై కసరత్తు షురూ చేసింది. ఈనెల 15, 16 తేదీల్లో రాష్ట్రవ్యాప్తంగా గ్రూప్ 2 పరీక్షలను నిర్వహించనున్నారు. ఈ గ్రూప్-2లో మొత్తం నాలుగు పేపర్లు ఉంటాయి. టీజీపీఎస్సీ షెడ్యూల్ ప్రకారం.. పేపర్-1 డిసెంబరు 15వ తేదీ ఉదయం 10 గంటల నుంచి మధ్యాహ్నం 12.30 గంటల వరకు నిర్వహించనున్నారు. అదే రోజు మధ్యాహ్నం 3 గంటల నుంచి సాయంత్రం 5.30 గంటల వరకు పేపర్-2 ఉంటుంది. ఇక డిసెంబర్ 16వ తేదీన పేపర్ 3, 4 పరీక్షలు నిర్వహించనున్నారు. గ్రూప్-2 ప్రతి పేపరులో 150 ప్రశ్నలు 150 మార్కులకు నిర్వహించనున్నారు.
మరోవైపు వీలైనంత త్వరగా టీజీపీఎస్సీ గ్రూప్ 1 ఫలితాలు విడుదల చేసే దిశగా తెలంగాణ పబ్లిక్‌ సర్వీస్‌ కమిషన్ కార్యాచరణ ప్రారంభించింది. మెయిన్స్ పరీక్షలు పూర్తయిన నేపథ్యంలో.. జవాబు పత్రాల మూల్యాంకం కొనసాగుతోంది. మూల్యాంకనం పూర్తి కాగానే.. మెరిట్ జాబితాను సిద్ధం చేయనుంది. ఒక్క పోస్టుకు ఇద్దరిని ఎంపిక చేసి వారి ధ్రువపత్రాలను పరిశీలించనుంది. ఈ ప్రక్రియ పూర్తి చేసేందుకు రెండు నుంచి మూడు నెలల సమయం పట్టనుంది.
తుది ఫలితాలను 2025 ఫిబ్రవరి నెలలో ప్రకటించాలని టీజీపీఎస్సీ యోచిస్తోంది. మొత్తం 563 పోస్టులకు 2024 ఫిబ్రవరి 19వ తేదీన టీజీపీఎస్సీ ప్రకటన జారీ చేసింది. 4,03,645 మంది అప్లికేషన్లు చేసుకోగా.. జూన్‌ 9వ తేదీన ప్రిలిమినరీ ఎగ్జామ్ జరిగింది. మెయిన్స్ పరీక్షలకు 31,382 మంది అభ్యర్థులు ఎంపిక కాగా.. వీరిలో 21,093 మంది మెయిన్స్ పరీక్షలకు హాజరయ్యారు.
