మాజీ ఎంపీ హరిరామ జోగయ్య పేరుతో మోసాలు జరిగాయి. పలువురు ప్రముఖులకు గుర్తు తెలియని వ్యక్తులు ఫోన్ చేసి, వాట్సాప్, ఫేస్బుక్ ద్వారా డబ్బులు అడుగుతున్నారు. ఒకరిద్దరు నిజమని నమ్మి డబ్బులు పంపించగా పంపించారు.. ఈ విషయం తెలియడంతో మాజీ ఎంపీ పోలీసులకు ఫిర్యాదు చేశారు. అక్రమ వసూళ్లకు పాల్పడిన కేటుగాళ్లపై చర్యలు తీసుకోవాలని కోరారు. ఇలా ఎవరూ మోసపోవద్దని హరిరామ జోగయ్య తెలిపారు.
మాజీ ఎంపీ, కాపు సంక్షేమ సేన అధ్యక్షుడు చేగొండి హరిరామజోగయ్య పేరుతో సైబర్ మోసం జరిగింది. కొందరు కేటుగాళ్లు పలువురు ప్రముఖులకు ఫోన్ చేసి, వాట్సాప్, ఫేస్బుక్ మెసేజ్‌ల ద్వారా డబ్బులు అడుగుతున్నారు. కొంతమంది నిజమేనని నమ్మి డబ్బులు పంపారు. బాధితుల్లో మాజీ ఉమ్మడి ఆంధ్రప్రదేశ్ హోంమంత్రి జానారెడ్డి, రిటైర్డ్‌ ఫారెస్ట్‌ అధికారి రావు కూడా ఉన్నారు.
తన పేరుతో సైబర్ మోసాలు జరుగుతున్నాయని తెలియడంతో హరిరామజోగయ్య పశ్చిమ గోదావరి జిల్లా పాలకొల్లు పట్టణ పోలీసులకు ఫిర్యాదు చేశారు. అలాగే, తన పేరిట డబ్బులు వసూలు చేస్తున్నవారి విషయంలో అప్రమత్తంగా ఉండాలని బహిరంగ లేఖను విడుదల చేశారు. ఎవరు సొమ్ములు అడిగినా ఇవ్వొద్దని విజ్ఞప్తి చేశారు. హరిరామజోగయ్య కూడా ఉమ్మడి ఆంధ్రప్రదేశ్ రాష్ట్రంలో హోంమంత్రిగా పనిచేశారు. సైబర్ నేరగాళ్లు జోగయ్య పేరిట జానారెడ్డి నుంచి రూ.9 వేలు వసూలు చేసినట్లు తెలుస్తోంది.
తన పేరుతో మాట్లాడుతూ అర్జంటుగా డబ్బులు అవసరమని చెబుతూ తనకు తెలిసిన ప్రముఖుల నుంచి డబ్బులు కొట్టేస్తున్నారని లేఖలో ప్రస్తావించారు. వీరిపై తాను పాలకొల్లు పోలీసులకు ఫిర్యాదు చేశానని.. ఎవరూ ఇలా మోసపోవద్దని కోరారు. సైబర్ కేటుగాళ్లు 7801096535, 9652196535 నంబర్ల నుంచి ఫోన్ చేస్తున్నారని అప్రమత్తంగా ఉండాలని సూచించారు.
