గతేడాది చంద్రుడు దక్షిణ ధ్రువంపై చంద్రయాన్ 3 ని సాఫ్ట్ ల్యాండింగ్ చేసి చరిత్ర సృష్టించిన భారత అంతరిక్ష పరిశోధన సంస్థ ఇస్రో.. సూర్యుడి గుట్టు విప్పేందుకు నింగిలోకి పంపించిన ఆదిత్య ఎల్ 1 ప్రయోగాన్ని కూడా విజయవంతంగా నిర్దేశిత కక్ష్యలోకి ప్రవేశపెట్టింది. 2023 సెప్టెంబర్ 2 వ తేదీన ప్రయోగించిన ఆదిత్య ఎల్ 1.. 127 రోజుల సుదీర్ఘ ప్రయాణం తర్వాత ఇవాళ (శనివారం).. సూర్యుడికి సమీపంలోని లాగ్రాంజ్ పాయింట్ 1 వద్దకు చేరుకుంది. 15 లక్షల కిలోమీటర్లు ప్రయాణించిన ఆదిత్య ఎల్ 1 ను ఇస్రో శాస్త్రవేత్తలు నిర్దేశిత కక్ష్యలోకి ప్రవేశపెట్టారు.ఐదేళ్ల పాటు ఈ ఆదిత్య ఎల్ 1 సేవలు అందించనుంది. సూర్యుడి గురించిన మరిన్ని విషయాలను సేకరించి భూమికి పంపించనుంది.ఇవాళ 63 నిమిషాల 20 సెకన్లపాటు ప్రయాణించిన తర్వాత ఆదిత్య ఎల్1 స్పేస్‌క్రాఫ్ట్‌ను భూమి చుట్టూ 235*19500 కిలోమీటర్ల దీర్ఘ వృత్తాకార కక్ష్యలోకి సాయంత్రం 4 గంటలకు విజయవంతంగా ఇస్రో శాస్త్రవేత్తలు చేర్చారు. ఇది భూమికి 15 లక్షల కిలోమీటర్ల దూరంలో ఉన్న లాగ్రాంజ్ పాయింట్ 1 చుట్టూ ఉండే హాలో కక్ష్యలో పరిభ్రమించనుంది.
అక్కడి నుంచి అది సూర్యుడిని పరిశీలించి భూమికి సమాచారాన్ని అందించనుంది. ఈ ఆదిత్య ఎల్ 1.. భారత అంతరిక్ష పరిశోధన సంస్థ ఇస్రో పంపిన తొలి అంతరిక్ష ఆధారిత అబ్జర్వేటరీ ప్రయోగం కావడం గమనార్హం. సెప్టెంబరు 18 వ తేదీ నుంచే సూర్యుడి శాస్త్రీయ సమాచారం సేకరించడం మొదలు పెట్టిన ఆదిత్య ఎల్ 1.. సెప్టెంబరు 19 వ తేదీ నుంచి సూర్యుడి దిశగా ప్రయాణం ప్రారంభించింది.అయితే ఈ ఆదిత్య ఎల్-1 కక్ష్యలో తిరుగుతూ సూర్యుడి గురించిన సమాచారాన్ని సేకరించేందుకు తనతోపాటు తీసుకెళ్లిన పరికరాలను ఉపయోగించనుంది. సూర్యుడిపై ఏర్పడే సన్ స్పాట్స్, సౌర జ్వాలలు, కరోనల్ మాస్ ఎజెక్షన్స్ వంటి విషయాలపై అధ్యయనం చేస్తుంది. కాగా.. ఈ ఆదిత్య ఎల్ 1 సూర్యుడిపై అడుగు పెట్టకున్నా.. సూర్యుడికి దూరంగానే ఉంటూ అక్కడ ఏర్పడే సౌర విద్యుదయస్కాంత ప్రభావాల గురించి ముందుగానే హెచ్చరిస్తుంది.
దీని వల్ల అంతరిక్షంలో ఉన్న భారత శాటిలైట్లు, కమ్యూనికేషన్ వ్యవస్థకు ఎలాంటి నష్టం కలగకుండా చూసుకోవచ్చు. సౌర తుఫానులు దాటిపోయేంత వరకు మన శాటిలైట్లకు ఎలాంటి ఇబ్బంది లేకుండా సేఫ్టీ మోడ్‌లో ఉంచేందుకు సాయపడుతుందని ఇస్రో ఛైర్మన్ ఎస్. సోమనాథ్ తెలిపారు.ఆదిత్య ఎల్-1 సౌర తుఫానులపై నిఘా ఉంచి అంతరిక్ష రక్షకుడిగా మారనుందని ఆశాభావం వ్యక్తం చేశారు.
