టాలీవుడ్ డ్రగ్స్ కేసులో 12మంది సెల‌బ్రిటీలకి ఎన్‌ఫోర్స్‌మెంట్ డైరెక్టర్(ఈడీ) ఇటీవ‌ల నోటీసులు జారీ చేసిన సంగ‌తి తెలిసిందే. మంగ‌ళ‌వారం డైరెక్టర్ పూరీ జగన్నాథ్ను ఈడీ విచారించింది. దాదాపు 10 గంటలకు పైగా ఈడీ అధికారులు పూరీ ప్రశ్నల వర్షం కురిపించారు. ఆయనకు సంబంధించిన బ్యాంక్ అకౌంట్స్, మనీ ట్రాన్స్ఫర్ వంటి అంశాలపై ఈడీ లోతుగా విచారించినట్లుగా తెలుస్తోంది.
ఇక ఈ రోజు న‌టి ఛార్మిని విచారించ‌నున్నారు అధికారులు. ఇందులో భాగంగా కాసేపటి క్రితం ఛార్మి ఈడీ కార్యాలయానికి చేరుకున్నారు. ఛార్మి తో పాటు విచారణకు ఆమె చార్టెడ్ అకౌంటెంట్ సతీష్ కూడా ఈడీ కార్యాలయానికి చేరుకున్నారు. మ‌రోవైపు ఆమెతో పాటు 15 మంది బౌన్స‌ర్స్ ఈడీ కార్యాల‌యం ద‌గ్గ‌ర‌కి చేరుకొని హంగామా సృష్టించిన‌ట్టు తెలుస్తుంది.
పూరీ జ‌గ‌న్నాథ్‌తో క‌లిసి ప‌ని చేస్తున్న ఛార్మీని ఈడీ అధికారులు డ్రగ్స్ కేసులో ప్రశ్నలు సంధించడంతో పాటు బ్యాంక్ లావాదేవీల వివరాలపై ఆరా తీయనున్నారు. ఇప్పటికే పూరీ జగన్నాథ్, ఛార్మి నిర్మాతలుగా కొన్ని సినిమాలు నిర్మించారు. దీంతో ఇద్దరి బ్యానర్లకు సంబంధించి పలు ప్రశ్నలు సంధించే అవకాశం ఉన్నట్లుగా తెలుస్తోంది.
డ్రగ్స్ కేసులో ప్రధాన నిందితుడిగా ఉన్న డ్రగ్స్ పెడ్లర్‌ కెల్విన్ అప్రూవర్‌గా మారడంతో పలువురు టాలీవుడ్ నటీనటుల పేర్లు బయటకి వచ్చాయి. కెల్విన్ అకౌంట్లో ఛార్మి డబ్బులు వేసిందా ? కెల్విన్తో ఆమెకు పరిచయం ఉందా ? ఛార్మీ కెల్విన్ అకౌంట్కు మనీ ట్రాన్స్ఫర్ చేసింది నిజ‌మేనా ? అన్న కోణంలోనూ ఈడీ విచారించనున్నట్లుగా తెలుస్తోంది.
